Tómas Orri

Þegar ég fór í leikskólann með Tómas Orra í morgunn sagði ég við hann þegar við komum út "það er bara alveg grenjandi rigning Tómas Orri". Hann leit á mig alveg hneikslaður og sagði "nei mamma, þetta er bara glöð rigning sem kemur úr himninum". Semsagt ekkert grátlegt við rigninguna sem herjar á okkur þessa dagana :-)

Hvar er lakkrísinn ???

Jamm, búið að baka piparkökur á þessum bæ þar sem allir tóku þátt sem vettlingi gátu valdið og skemmtu sér mjög vel. Í dag bökuðum við Guðrún Herdís svo lakkrísbitakökur sem ungfrúnni leist svo vel á í kökubókinni. Allt gekk vel þangað til að við áttum bara eftir að setja lakkrískurlið út í deigið. Þá gátum við ekki fundið lakkrísinn. Skildum ekkert í því hvar við hefðum gengið frá honum og leituðum og leituðum en allt kom fyrir ekki. Á endanum var pabbinn spurður hvort hann vissi nokkuð hvar gengið hefði verið frá lakkrísnum ??? Hmmmm, það varð fátt um svör og það kom dálítið skrítinn svipur á manninn. Andlitið á Guðrúnu Herdísi datt nánast af henni þegar í ljós kom að pabbi hefði borðað allan lakkrísinn. Þetta var nánast eins slæmt ástand og þegar pabbi Snuðru og Tuðru borðaði allt deigið áður en búið var að baka kökurnar (Guðrún Herdís var nú samt á því að pabbi Snuðru og Tuðru hefði brotið verr af sér en pabbi hennar)!!!! Allt endaði þetta nú samt vel því pabbinn rauk út í búð og keypti vænar byrgðar af lakkrískurli svo við gætum nú klárað kökurnar og í sárabætur keypti hann ís sem allir fengu í eftirmat. Allir fóru því sáttir og sælir að sofa, vitandi líka af honum Stekkjarstaur á leiðinni til byggða í nótt :-)

Giljagaur og Leiðindaskjóða

Jæja, þá er jólaundirbúningurinn í algleimingi. Ég fór í dag með Guðrúnu Herdísi og Tómasi Orra í Árbæjarsafnið til að kynnast betur gömlum íslenskum jólahefðum. Þar áttum við alveg stórgóðan dag þrátt fyrir þrumur og eldingar, haglél og sjókomu (enda kannski frekar að það hafi aukið á jólastemmninguna). Við skoðuðum öll húsin og þá dagskrá sem þar var boðið upp á. Hlustuðum á Iðunni Steinsdóttur lesa upp úr bókum sínum, dönsuðum úti í kringum jólatré með gömlum, íslenskum jólasveinum, Giljagaur (sem sjá má á myndinni með Tómasi Orra og Guðrúnu Herdísi) og Leiðindaskjóðu (sem var bara hreint ekkert leiðinleg þegar við fórum að tala við hana). Börnin fengu að fara hring með hestvagni og svo mætti áfram telja. Semsagt mjög gaman hjá okkur og ég er ekki frá því að þetta verði gert að árlegri hefð hjá okkur. Á meðan var Hjördís Ylfa heima hjá pabba því hún er með einhverja leiðindahálsbólgu litla skinnið.

Fyrsta skrefið

Hjördís Ylfa er búin að vera dugleg við að sýna okkur hvað hún er orðin stór síðustu vikurnar. Það voru nú eiginlega eldri systkinin sem kenndu dömunni þetta, því alltaf ef hún óvart lyfti hendinni þá jusu þau yfir hana hrósum um hvað hún væri stór. Á endanum fór sú stutta auðvitað að fatta þetta og fór að lyfta hendinni upp í tíma og ótíma hin hróðugasta og leit svo á systkinin að bíða eftir viðbrögðum.

Annars eru stóru fréttirnar þær að Hjördís Ylfa tók sitt fyrsta skref í gær. Já, hún ákvað að vera ekkert að slóra við þetta og var meira að segja svo tillitssöm að leyfa bæði mömmu og pabba að vera viðstöddum.

Húsmæðraorlof, ætti að vera skylda !!!

Skellti mér í húsmæðraorlof til Amsterdam yfir helgina. Fór ein og barnlaus og átti ótrúlega góðan tíma hjá fólkinu mínu þar í borg. Enn og aftur takk fyrir mig, maður fyllir heldur betur á orkutankinn með því að breyta svona til. Svo var náttúrulega æðislegt að koma heim aftur og hitta allt liðið. Hjördís Ylfa brosti sætt til mömmu sinnar þegar þau sóttu mig á flugvöllinn en hafði engan áhuga á að koma til mín, fannst greinilega bara fínt að vera hjá pabba. Alger dúlla. En þetta breyttist nú fljótt eftir að við komum heim og þá vildi hún ekki fara frá mér aftur :-)

Ballett

Í gær var síðasti balletttíminn hjá Guðrúnu Herdísi fyrir jól. Sá tími er þannig að foreldrar og systkini fá að koma og fylgjast með. Við mættum öll fjölskyldan og höfðum mjög gaman að. Tómas Orri fékk sleikjó svo hann ætti aðeins auðveldara með að sitja kyrr í sætinu sínu (af því að sykur er svo róandi :-) og í miðri sýningu hallaði hann sér að mér og sagði: "mamma þetta er bara mjög skemmtilegt". Guðrún Herdís stóð sig mjög vel og það var gaman að horfa á og sjá allar framfarirnar. Svo nú er komið jólafrí í ballettnum en ballerínan er staðráðin í að halda áfram eftir jól.

Tómas Orri og jólamjólkin

Tómas Orra rak í rogastans í matvörubúðinni í síðustu viku, það var komin jólamjólk á markaðinn !!! Jólamjólkin er semsagt þessi hefðbundna skreytt með myndum af jólasveinunum. Allavegana átti sá stutti ekki til orð yfir þessu og tók ekki annað í mál en að versla inn ríflega af þessum varningi. Ekki veitti af því, þar sem við kvöldverðarborðið gerði hann lítið annað en að biðja um meiri jólamjólk og okkur sýndist hann einn hafa drukkið um einn líter. Aðspurður staðhæfir hann að jólamjólkin sé allt öðruvísi og mun betri á bragðið en sú venjulega :-)

16.nóvember !!!

Guðrún Herdís 8 ára í dag. Læt hér fylgja með eina gamla og eina nýja mynd af stúlkunni.

Fyrsta orðið

Jæja, þá er Hjördís Ylfa farin að tala !!! Hún á reyndar langa leið fyrir höndum í þeim málum en fyrsta orðið er komið á hreint hjá henni. Orðið er "datt", þetta er búið að vera í mótun hjá henni síðustu vikurnar en nú hendir hún snuddunni sinni í gólfið og segir svo greinilega "datt". Hryllilega sætt, allavegana þangað til hún fer að henda öllu lauslegu í gólfið og láta okkur sækja það :-)

Hnútarnir

Eins og flestir vita skall á landinu hálfgert óveður um síðustu helgi. Við vorum þó stungin af úr bænum áður en ljóst var hvað spáin var svakalega slæm, og allt náttúrulega óbundið á pallinum hjá okkur, grillið og garðhúsgögnin. Þegar ég var búin að hlusta á nokkra fréttatíma á laugardeginum þar sem varað var við veðrinu og fólk beðið að binda allt lauslegt brá ég á það ráð að hringja í afa Dubba og biðja hann að huga að dótinu okkar. Hann var ekki lengi að bregðast við því og tjóðraði niður allt lauslegt. Þegar ég og börnin mín komum heim fórum við að huga að þessu. Ljóst var að þetta var ákaflega vel bundið og þá segir Guðrún Herdís "mamma er ekki best að biðja afa Dubba bara um að leysa þetta aftur, því hver er sínum hnútum kunnugastur" !!!

Til hamingju með daginn !!!

Afi Grétar 65 ára í dag.

Til hamingju með daginn og takk fyrir þessa líka fínu veislu.

Lítill aðdáandi

Guðrún Herdís er búin að vera í vetrarfríi í skólanum sínum. Erum búnar að hafa ýmislegt fyrir stafni en að mestu búnar að hafa það gott hér heima mæðgurnar og slappa af. Í dag var Guðrún Herdís að föndra af miklum móð og Hjördís Ylfa sniglaðist allt í kringum hana, mjög áhugasöm lítil föndurkona :-)

Könglaleiðangur í Heiðmörk

Ég , Guðrún Herdís og Tómas Orri skruppum upp í Heiðmörk í dag í leit að könglum. Fundum og söfnuðum fullt af þeim í yndislegu veðri. Við gengum reyndar svo langt að okkur tókst eiginlega að "villast" þarna í þessum íslenska skógi. Allt fór þó vel og við fundum aftur rétta stíginn en vorum þá orðin ansi sein fyrir því við vorum á leið í þriggja ára afmæli til Þórðar Inga vinar okkar. En með því að breyta gönguferðinni í skokkferð hófst þetta nú allt að lokum og við komumst heim með könglana og vorum mætt á réttum tíma í afmælið.

Afmælið var í Grafarvoginum og ætluðum við að sjálfsögðu að keyra sem leið lá í átt að Vífilstöðum en sú leið er nánast ófær nema að nóttu til um þessar mundir vegna umferðarþunga. Það bráðliggur á að ljúka við tvöföldun vegarins á þessari leið. Okkur tókst þó að beygja inn hjá IKEA og snúa við og fara "Fjarðarkaupsleiðina" í staðinn.

Orð dagsins á annars Tómast Orri, hann leit á mig hér í kvöld og sagði "mamma, þú ert fallegasta konan sem til er í heiminum", þar höfum við það fyrir þau ykkar sem ekki vissuð þetta fyrir :-)

Lítil pissudúkka

Hjördísi Ylfu finnst voða notalegt þessa dagana að fá að hnuðlast um án bleyjunnar, þegar hún er sett þannig á gólfið þá tístir hún og skríkir af ánægju. Í gær fékk hún að ferðast um á gólfinu í tölvuherberginu svona frjáls. Hún var fljót að rjúka að bókahillunni og standa þar upp og þar gerði hún sér lítið fyrir og sprændi á bækurnar sem fyrir voru. Svo vildi þó til að allar bækurnar sem urðu fyrir barðinu á þessari uppákomu voru í eign móður hennar !!! Þetta fannst pabba hennar ákaflega gott hjá þeirri stuttu :-)

Þjóðlegt afmæli

Um helgina fórum við stórfjölskyldan í þjóðlegt og skemmtilegt barnaafmæli, þar sem hún Hildur vinkona okkar varð 7 ára gömul. Þema afmælisins var gamli tíminn og voru þónokkrar mættar í þjóðbúningum og aðrir veislugestir í sínu fínasta pússi, eins og sjá má á myndunum sem fylgja þessari færslu.

Kaplapriki

Tómas Orri er nýlega byrjaður í íþróttaskóla hjá FH á laugardögum. Þetta er mjög skemmtilega upp settur íþróttaskóli sem byggist á þrautahringjum sem börnin fara í gegnum undir leiðsögn þjálfara (og foreldrar taka fullan þátt í aðstoðinni). Enda finnst Tómasi Orra og reyndar okkur báðum mjög gaman þarna. Ekki skemmir svo fyrir að þetta er þátttakendum að kostnaðarlausu - húrra fyrir Hafnarfirði sem greiðir niður gjöld fyrir íþróttaiðkun barna. Í dag keyrðum við svo framhjá íþróttahúsinu þar sem kennslan fer fram og þá segir Tómas Orri "af hverju er íþróttaskólinn minn í Kaplapriki", já betra að tala skýrt við þessi kríli !!!

Kuldagallar

Það kom að því, kuldagallarnir voru dregnir fram í morgunsárið og veturinn þar með kominn á mínum bæ. Svosem ekki hægt að kvarta eftir langt og gott haust. Mestu vonbrigðin hjá börnunum er að það sé ekki kominn snjór þó að vetur konungur sé genginn í garð. Guðrún Herdís rýkur út í glugga á hverjum morgni og heyrist svo tauta “ohhh hvenær kemur snjórinn”. Veit ekki alveg hvort ég deili þessum spenningi með þeim en þeim verður örugglega að ósk sinni fyrr en síðar.

Hjördís Ylfa og Grétar Björn

Þau eiga það sameiginlegt þessi frændsystkini að vera alveg hryllilega sæt :-)

Bráðum koma blessuð jólin !!!

Þar sem ég bý í næsta nágrenni við hið nýja IKEA hef ég ekki komist upp með annað en að fylgjast með framkvæmdum þarna síðustu mánuði. Fyrir nokkru komu þeir fyrir stóru skilti á versluninni sem á stóð "Opnum 12.október". Að kvöldi 11.október átti ég leið þarna framhjá og sá að þeir voru búnir að fjarlægja skiltið og var að spá í hvaða skilti þeir myndu þá koma fyrir í staðinn. Viti menn, daginn eftir var komið nýtt sem á stóð "Jólin þín byrja í IKEA" !!! Átti hreinlega ekki til orð, og mér sem finnst sumarið varla liðið !!!

Skólaskemmtun

Ég og Hjördís Ylfa mættum á skólaskemmtun hjá 3.bekk í morgun, þar sem bæði leikur og tónlist voru á dagskránni. Guðrún Herdís lék með bekknum sínum í voða skemmtilegu leikriti sem fjallaði um stóra fjölskyldu sem fór í sólarlandaferð :-) Að auki spilaði hún á flautu með tveimur vinkonum sínum eins og sjá má á myndinni (ef vel er gáð) !!! Semsagt skemmtilegur morgunn hjá okkur mæðgunum þremur.

"Kóngulóarmamma"

Á heimilinu býr um þessar mundir alveg ótrúlega glaður "spiderman". Hann breytir þó stöku sinnum um hlutverk og er þá Tómas Orri en aðallega er hann kóngulóarmaðurinn ógurlegi :-) Í dag er svo búningadagur á leikskólanum og að sjálfsögðu mætti kappinn í nýja búningnum sínum. Þegar við mættum á leikskólann voru komnir 5 aðrir kóngulóarmenn sem voru allir alveg rosalega glaðir að hittast, 1 kúreki og 1 Hrói Höttur. Síðan voru á leiskólann líka mættar fullt af svakalega fínum prinsessum í þvílíku kjólunum með uppgreitt hárið, náttúrulega bara sætt :-)
En á leiskólanum voru þó engar stelpur í spidermanbúningum og engir strákar sem prinsessur, hmmmm !!! Maður leiðir óneitanlega hugann að því hvort við séum að ala börnin okkar upp í fyrirfram stöðluðum kynjaímyndum ? Auðvitað fæðast þessi kríli ekki með fyrirfram ákveðnar ímyndir um hlutverk kynjanna og sumir vilja meina að við ákveðum þetta allt fyrir þau. En eftir að vera orðin þriggja barna móðir barna af báðum kynjum þá er ég sannfærð um að þetta er allavegana að góðum hluta eitthvað sem er innbyggt í þau (hvort sem við svo ýtum undir þessi kynjahlutverk, það gæti svosem verið og er eitthvað sem maður ætti að hafa í huga). En það er alveg ljóst að kappinn minn hefði ekki orðið neitt yfir sig sæll ef ég hefði gefið honum prinsessukjól eða Rauðhettu-búning. En þegar hann sá "spiderman-búninginn" hreinlega ljómaði drengurinn af ánægju, og er það ekki málið :-)

Tennur trufla nætursvefn

Hjördís Ylfa tekur tanntöku almennt með trompi. Ekki nóg með að fyrstu tennurnar komu þegar hún vara bara 4 mánaða heldur eru núna þessa dagana að riðjast í hana 4 stk tennur, næstum því allar í einu. Enda var hún búin að vera svolítið pirruð og skyldi engan undra það.
Það var gaman að fylgjast með þeim systrum í dag. Þegar Guðrún Herdís kom heim úr skólanum var Hjördís Ylfa að leika sér í eldhúsinu, hún heyrir að stóra systir er að koma og stendur þá við hliðið í eldhúsdyrunum og dillar sér. Svo þegar stóra systir birtist í stiganum þá bókstaflega ískraði í þeirri stuttu og hún skellihló :-) Frekar sætt og ekki fannst nú Guðrúnu Herdísi þetta leiðinlegt.

Skólastúlkan :-)

Skál í botn !!!

Jamm - fyrsta lögun tilbúin. En nei ekki er það rauðvín sem um ræðir heldur eðalkrækiberjasaft ala Kristín. Já, einhverntíma verður allt fyrst og nú var það saftin. Heppnaðist bara ágætlega að ég held. Það verður ekki amalegt að nota hana út á grjónagrautinn á næstunni - einhver æskunostalgía tengd því :-)

Í berjamó og mótmælagöngu

Skruppum austur fyrir fjall í gær og skelltum okkur í berjamó með ömmu og afa. Sennilega síðasti berjamórinn þetta árið enda bara fáir dagar í að októbermánuður heilsi okkur. Afi leiddi okkur að þessari líka fínu berjabrekku þar sem voru nóg af bláberjum og líka mikið af krækiberjum þó þau væru mörg orðin nánast of þroskuð. Þannig að nú er engin miskun, húsmóðirin verður að fara að sulta og safta.
Brunuðum svo aftur í bæinn um kvöldmatarleitið til að komast niður í bæ að mótmæla virkjunarframkvæmdum á hálendinu. Við fórum þangað allar mæðgurnar þrjár, þannig að uppeldi dætranna var vel sinnt í gærkvöldi :-)

Góðir gestir

Fengum góða gesti um helgina þar sem eru Menja, Róbert og börn úr Stykkishólminum. Þau komu hér á föstudag og gistu fram á laugardag og með þeim í för var hundurinn þeirra hún Flóra sem vakti ekki litla lukku hjá börnunum á mínu heimili. Hundurinn var bókstaflega eltur um allt, upp og niður og út og suður. Hann lét sér það bara ótrúlega vel líka enda sérlega vænn hundur þar á ferð. Hjördís Ylfa var sú eina sem ekki var neitt sérlega hrifin og þegar Flóra tók að gelt á kött sem átti leið fram hjá húsinu leist henni ekkert á blikuna og fór að hágráta.

"Tætubuska"

Ja, nú má fólk fara að passa sig. Framfarirnar hjá Hjördísi Ylfu eru hraðar þessa dagana. Hún kemst orðið um á ótrúlegum hraða og er í því að kanna umhverfið í kringum sig. Tekur á öllu sem hún kemst í og kannar það með litlu puttunum sínum og smakkar á því líka, eins og vera ber þegar maður er 8 mánaða. Skemmtilegast er svo að komast í herbergin hjá stóru systkinunum og skoða sig um þar, alger ævintýraheimur :-)
Annars var Hjördís Ylfa að þyngjast aðeins minna en venjulega í 8 mánaða skoðununni en það orsakast nú líklega af því að nú er hún mikið að skipta úr brjóstamjólkinni yfir í aðra fæðu auk þess sem hún hreyfir sig orðið svo mikið allan daginn.

Hjördís Ylfa stendur upp

Já, það er nú bara það. Hún Hjördís Ylfa gerði sér lítið fyrir og stóð upp í fyrsta sinn í síðustu viku, rétt tæpra 8 mánaða. Hlutirnir gerast hratt og í dag stendur hún upp bókstaflega allsstaðar þar sem það er á annaðborð möguleiki, bara sætt :-) Væri samt alveg til í að hún færi sér ekkert of hratt í að byrja að ganga, hún er svo mikill kálfur ennþá þessi elska.

Tómas Orri í sauðburðinum í vor

14.september

14.september 2002-2006. Einkasonurinn 4 ára í dag. Finnst eins og það hafi gerst í gær að hann fæddist á Landspítalanum. Fór að sofa hin sprækasta að kvöldi 13 sept. og var drengurinn kominn í heiminn kl. 8:30 morguninn eftir. Hann kom stór og flottur, reyndar svo stór að eftir var tekið og starfsfólkið kom sérstaklega til að skoða hann þess vegna. Athyglin vegna þessa var reyndar þannig að móðurinni þótti á köflum nóg um. En síðan eru semsagt liðin 4 ár og hann orðinn töluvert stærri, en ennþá jafn sætur og yndislegur :-) Ótrúlegt hvað þessi tími líður hratt. Mér finnst maður með tímanum verða einhverveginn meðvitaðri um að njóta þessara litlu kríla því áður en maður veit af verða þau vaxin úr grasi. Búið er að halda upp á afmælið hans en við gátum þó ekki setið á okkur og skellt í eina súkkulaðiköku svona í tilefni dagsins.

betri samviska

Stefni á að setja hér inn nokkur orð um það sem á daga hinnar heimavinnandi húsmóður drífur. Plöguð af samviskubiti yfir að vera ekki fyrir löngu búin að útbúa heimasíðu fyrir hvern afkomanda á barnalandi eða álíka stað sé ég þetta sem ákveðna lausn fyrir samviskuna, þar sem ég get hér einnig sett inn helstu fréttir af gullmolunum og jafnvel stöku mynd !!! En eins og vera ber á stóru heimili verður þessari fyrstu færslu að ljúka þar sem örverpið er vaknað eftir væran blund og kallar á þjónustu :-)